[轉載/Youtube] 維園年宵市場歷來都係各大政黨「兵家必爭」之地，各出奇謀爭取市民掏腰包支持。民主黨趁諾貝爾和平獎熱潮未退，特別製作劉曉波、昂山素姬以及華里沙三款和平獎得主肖像「快勞」，一套 25蚊；同場亦有由尊子所畫、每件 60蚊嘅華叔肖像 tee出售，方便市民今年六四着住去燭光集會。
長毛反思黨爭對錯
社民連雖然分裂，但繼續喺維園擺檔，出售主席陶君行同長毛著作以及名產雙截棍香蕉。仍在考慮去留嘅長毛都有現身，表明會幫手籌募會址基金經費，仲話正反思喺黨爭中有冇做錯，以及社民連仲可唔可以幫佢實踐政治理念，新年後會有決定。
民建聯今年避走荃灣，維園建制派攤檔幾乎只剩低啱啱成立嘅新民黨。民建聯曾鈺成以立法會主席身份出席開幕禮，算係畀足面葉劉。佢其後更主動行過幾步去民主黨攤檔到賀，忽然獲贈劉曉波「快勞」嘅曾主席面無懼色，仲祝賀民主黨「丁財兩旺」，唔知黨員會唔會呷醋？收厚禮嘅唔只曾鈺成，選民力量成員噚日成功突圍向卿姐送上「民主女神棍」，卿姐笑笑口攞住走，仲繼續同大家揮手。
蘋果日報 - 2011-01-28 - 隔牆有耳：女神棍維園橫行
[轉載/Youtube] 女神棍維園橫行
發新年財樂園維園年宵開波，八方第一時間到場睇睇有乜好嘢。猶記得去年件「禮義廉」 T恤賣到斷市，民建聯嬲到向海關舉報要政府掃場，今年民建聯避走到荃灣年宵，驚再俾人玩殘，代之而起成為諷刺對象嘅係白鴿黨。擺出戰鬥格揚言追擊白鴿黨嘅「選民力量」，今年製作三大年宵精品為白鴿黨「開年」，唔少市民見到都愛不釋手，選舉勝負未知，呢盤生意贏錢，應該冇難度。
件件產品夭心夭肺
白鴿黨去年向阿爺交心，成功起錨通過政改方案，「選民力量」為咗表揚白鴿黨人，特別推出賀年精品，八方覺得必買嘅一定係以卿姐做主角嘅「民主女神棍」，呢碌吹氣棒外剛內柔，真係見棍如見人，象徵無數香港人被卿姐一棍扑醒、當頭棒喝，民主夢醒嘅痛苦經歷，「民主女神棍」每支賣 48蚊，當係買個教訓，真係抵到震。
不滿起錨政改方案嘅人，唔少家陣仲怒火中燒，想消消氣，可以買把「民主扇」，呢把紙扇好犀利，宣傳口號係「民主黨，跣香港」，一撥就跣晒全港市民，每把扇定價 48蚊，八方拎上手隨意撥咗幾撥，唔知點解，雖然氣溫僅十幾度，卻越撥越㷫，撞鬼佢吖！
為免撥得太「行」再跣香港，八方暫時放低把「民主扇」，見到有個卿姐與六個支持起錨方案白鴿黨議員肖像嘅「卿姐七友」坐墊，造型十分趣致，負責睇檔嘅「選民力量」林雨揚立即狂 sell，話個坐墊軟腍腍，長者用最好，花 68蚊買個畀阿爺墊屁股，包保老人家笑呵呵。
林雨揚話呢幾件實用精品限量生產數百件至 1,000件，售完即止，復刻無期，有買趁手咁話。其他政黨賀年產品相形見絀，公民黨有余若薇墨寶書籤，「經濟動力」義賣暖腳套，而分裂嘅社民連，今年氣勢大不如前，去年暢銷嘅長毛、黃毓民、大嚿 figure，今年因為兩人已退黨而抽起唔賣，一年之前，邊個會想到有此一日呢？
YouTubeHK 精選影片 www.youtubehkvideo.com [主頁] [最新影片]
0 comments:
Post a Comment