[轉載/Youtube] 《狄仁傑》 13提名 金像獎領先 超儀爭影后 賭王打氣
【第 30屆金像獎之提名名單】
香港影壇年度盛事「第三十屆香港電影金像獎頒獎典禮」將於 4月舉行，大會昨日公佈提名名單（詳見附表），《狄仁傑之通天帝國》以 13項提名稱冠，但該片男主角劉德華卻落馬沒份提名最佳男主角，由《孔子》周潤發決戰《綫人》張家輝爭影帝；女主角方面則由《維多利亞壹號》女殺手何超儀惡鬥《志明與春嬌》的煙鏟楊千嬅，超儀昨日表示獲父親賭王打氣，支持她拍好電影。
香港電影金像獎大會昨日在尖沙嘴舉行記者會，公佈「第三十屆香港電影金像獎頒獎典禮」 19項入圍名單，《狄仁傑之通天帝國》獲提名最多，以 13項提名封榜首，其次是 11項提名的《劍雨》及 10項提名的《葉問 2》，頒獎禮將於 4月 17日於文化中心舉行。
「佢好想睇到我成功」
今年以影后之爭最激烈，包括《維多利亞壹號》的何超儀、《志明與春嬌》的楊千嬅、《月滿軒尼詩》的湯唯、《狄仁傑》的劉嘉玲和《分手說愛你》的薛凱琪，當中以均是首度提名金像獎最佳女主角的超儀和千嬅最熱。近日因賭王爭產風波而成焦點的超儀，昨日接獲記者來電時剛好和賭王一起，她第一時間向賭王說：「阿爸，我得咗啦！」接着超儀向記者說：「佢好想睇到我成功，叫我畀心機做，努力拍好電影。」
超儀表示獲賭王支持，她說：「我最開心都係呢部電影喺香港有提名，因為係一部好香港人嘅電影，雖然角逐對手好強，不過之前得到西班牙影后，令我信心加強，我最想多謝導演，特別要多謝我爸爸，冇佢哋支持信任，呢部戲唔能夠咁成功完成。」
千嬅：唔敢太大期望
千嬅早前憑《抱抱俏佳人》獲「第 17屆香港電影評論學會大獎」最佳女演員，昨日又憑《志》片獲金像獎影后提名，她開心說：「今次有影后提名已經好開心，如果能夠攞埋就更好啦！因為我個心都好恨，但對手唔弱，好似嘉玲姐同超儀都係強對手，佢哋演出好精采，唔敢有太大期望。」在《狄》片扮武則天的嘉玲說：「自己入圍已經當拎獎，我演呢個角色好特別，雖然拍得好辛苦，個頭飾好重成日要休息，今次得到呢個成果，覺得好值得。」
身在北京的薛凱琪昨日接獲入圍喜訊時，情不自禁在電話中歡呼說：「第一次入圍女主角真係特別開心，其他對手都好強，不過我拎唔拎到獎都一樣咁開心。」憑《月滿軒尼詩》爭獎的湯唯現於韓國宣傳電影《晚秋》，她對於獲提名感愕然和意外。
《狄仁傑》雖威盡提名榜，男主角劉德華卻未能候選影帝，反而他投資的《打擂台》刀仔鋸大樹殺出血路，獲最佳電影、最佳導演及最佳編劇等 7項提名，演武館師傅的泰迪羅賓更獲提名最佳男配角，其生鬼傳神演繹，獎項近乎手到拿來，而《打》片與《狄仁傑》、《葉問 2》、《劍雨》和《綫人》競逐最佳電影也絕對有得鍊。
發哥張家輝競逐影帝
至於影帝提名就未見突出，近日挾《讓子彈飛》先獲亞洲電影大獎最佳男主角提名的發哥，昨日又獲金像獎影帝提名，他昨日說：「都好多年冇金像獎提名，當然開心，今年有兩部戲得到提名，但邊部戲可以攞獎就好難講，因為對手嘅戲冇睇過，其實攞唔攞到獎都唔緊要。講真演《孔子》呢部戲要講咁多文言文普通話，係有一定難度，加上每個人心中都有唔同角度嘅孔子，好難要所有人認同我演繹嘅孔子。」
昨日出席金像獎記者會的張家輝，談到入圍感受時說：「部戲有咁多提名，好開心得到咁好成績，上次《証人》導演林超賢冇提名，我一直耿耿於懷，今次林超賢入圍特別替佢開心。」霆鋒則謂對攞獎與否抱平常心。
YouTubeHK 精選影片 www.youtubehkvideo.com [主頁] [最新影片]
0 comments:
Post a Comment