YouTubeHK 精選影片 03: [時事] 曾俊華派糖輸畀香港澳門人要求加碼

鬍鬚曾、崔世安 show hand( 2011-03-04 )

[轉載/Youtube] 鬍鬚曾轉軚宣佈派錢，希望以6,000蚊解決燃眉之急，減少星期日上街人數，不過呢招卻產生港府意想唔到嘅連鎖反應──澳門人知道香港豪派6,000蚊後，即時要求澳門特首崔世安加碼派錢，因為澳門今年只係每人派4,000蚊，少香港三分一，要求政府回水嘅呼聲，環迴港澳。

收集逾萬個簽名
澳門有電視台在港府宣佈派錢後，即時在當地做街訪，澳門人多數覺得鬍鬚曾大手筆，反觀澳門政府就比較孤寒，因為澳門前幾年都係派6,000蚊，今年卻縮水派4,000蚊，香港一派就多兩千蚊，仲有退稅，市民分分鐘有成萬蚊落袋，難怪令澳門人羨慕。

澳門工人自救會理事長張榮發話，已收集逾11,000個簽名要求崔世安還富於民，希望下半年加碼再派4,000蚊紓解民困。如果澳門人願望成真，即係全年有8,000蚊落袋，多香港人2,000蚊喎，屆時唔知有冇人要鬍鬚曾添啲呢？

至於獲派最多約4,880港元嘅新加坡人，八方相信佢哋唔會上街要求加碼，但對視香港為主要對手嘅新加坡高官而言，冇理由想輸畀香港啩！