[轉載/Youtube] 佘詩曼同陳豪孭飛嘅無綫劇《公主嫁到》雖然播完幾個月，但祝捷飯局依然未食完，好似前晚咁，就輪到劇中演員關菊英請食飯，菊姐唔單止自掏荷包擺幾圍，連佢嘅同性密友周偉利（Willy）都有出現，佢仲以半個主人家身份幫菊姐招呼同事，認真體貼。
法拉送琴姐返家
前晚菊姐喺中環雲咸街嘅上海總會請食上海菜，出席者包括陳法拉、葉翠翠、韓馬利、李國麟、惠英紅、李香琴、蕭正楠、姚子羚、阮兆祥同監製梅小青及幕後工作人員等幾十人，但陳豪同阿佘就因為分別喺香港同內地拍劇而未有現身。佢哋食到10點幾就陸續離開，見法拉唔單止扶實琴姐，而且仲用自己部七人車送埋佢老人家返屋企。至於惠英紅就好搞笑咁指住身邊嘅李國麟話：「我同奸夫一齊走呀！」然後急急腳鬆人。
身為老細嘅菊姐最後同Willy一齊離開，佢話：「今晚我負責請食飯，今晚都算好齊人o架啦！」問佢究竟會唔會原班人馬再開劇時，菊姐就話：「自己都好想，但都要問監製。農曆年之後我可能會開新劇。」法拉、葉翠翠同姚子羚更分別將飯局嘅相放上微博，大讚餸菜好味道。
YouTubeHK 精選影片 www.youtubehkvideo.com [主頁] [最新影片]
0 comments:
Post a Comment