YouTubeHK 精選影片 03: [娛樂] 朗拿度掛靴力不從心難再戰

身心受創　肥哨掛靴( 2011-02-15 )

[轉載/Youtube] 身心受創　肥哨掛靴

講大話，甩「哨」牙，對於朗拿度前日又話會掛靴，睇怕今次堅過石堅。實際啲，不如聯想吓佢掛靴後會有咩搞作，誠意推介佢嚟香港拍戲，無論係做番自己，或者扮藥油王子、爭產主角，金像獎十拿九穩。

「力不從心難再戰」
「我想繼續，但真係頂唔順。個腦想繼續，不過身體話我知唔得。」就掛靴一事，「大哨」已經講過好多次，不過今次唔同，就算你唔信佢，都應該信吓外國通訊社嘅判斷，因為各大通訊社噚日放出大量佢嘅足球生涯圖輯。又係嘅，佢多年嚟喺綠茵場奔馳，怕且下身（指大髀、膝頭、足踝）冇邊忽完好，仲唔退落嚟博獻世咩？
「大哨」掛靴後肯定有排忙，首先佢講明有意喺未來角逐哥連泰斯會長一職，少不免成日流連球場同球圈人打交道；加埋周不時參加聯合國慈善賽，根本冇可能離開個波。另外，佢又要忙於做湊仔公，湊兩個仔朗拿德、阿歷士、兩個女蘇菲亞同埋愛麗絲唔易o架（否則佢都唔會咁後生就紮啦）。德仔、阿歷士同愛麗絲都係4月份出世，「大哨」一早拍心口應承到時搞個超盛大嘅生日派對，家籌備定都啱囉。

不如來港搵羅生
查實爭做會長、做湊仔公之外，仲有大把嘢啱朗拿度做。佢個人娛樂性豐富，進軍娛樂圈肯定都撈得掂，淨係由佢親身演繹98年世盃決賽失準真相已經係賣點，假如佢肯放下身段走諧趣路線，嚟香港發展，話唔定鬼馬過喺《賭俠1999》扮佢嘅張家輝。至於扮藥油王子或者爭產主角，只要剃番光頭，唔使化妝都維肖維妙。
我求大俠仲有一個建議，佢不妨考慮嚟香港落班，就算得番一至兩成功力都足夠喺港甲立足；佢咁滑頭，肯定識得喺情人節入波後送個心畀老闆。羅生，會唔會諗吓佢？