YouTubeHK 精選影片 03: [時事] 財爺催眠大法官民齊嗌早抖

財爺催眠大法　官民齊嗌早抖( 2011-02-24 )

[轉載/Youtube] 下年度預算案藏富於官，激起民憤全城喊打，不過市民噓聲、罵聲卻冇打擾官員小憩，噚日財爺鬍鬚曾宣讀預算案時，多位官員陷入睡眠狀態，其中政制局局長林D9最早掛起免戰牌，鬍鬚曾讀咗冇幾多段，林D9已沉沉入睡，睡姿透過電視直播傳遍香港，搞到八方唔使聽、唔使睇預算案內容，都知道冇料到。

多人閉目養神
律政司司長黃仁龍日理萬機，噚日都敵不過鬍鬚曾悶死人預算案而閉目，身體語言顯示佢已經冇眼睇。教育局局長孫明揚一如以往熟睡，乃念佢服務香港人多年，家陣已一把年紀，八方要求港府高層明年以人道理由，容許孫公免役唔使聽預算案，帶頭敬老以作表率。
坐在旁聽席嘅行會成員梁智鴻、葉維義，似乎亦對預算案冇乜興趣，幾乎全程閉目養神，至於行會召集人梁振英，一面讚揚預算案「相當全面」，但又指出下年度政府總開支較本年度多700億元達到3,700億元，認為「不能夠長此下去」年年派錢，佢對預算案真正評價如何，可想而知。