YouTubeHK 精選影片 03: [娛樂] 四太情人節趕絕本地名牌

四太情人節　趕絕本地名牌( 2011-02-11 )

[轉載/Youtube] 自由行湧港帶挈本地零售業生意多到做唔切，購物旺區銅鑼灣、尖沙嘴舖租節節上升，名牌名店集中地中環皇后大道中更加係兵家必爭之地，國際知名品牌、鐘錶珠寶店都肯畀巨額租金搶佔有利位置做內地豪客生意。

變樓上舖做熟客
租金暴漲業主當然開心，不過舊租戶卻被迫讓路結業。在中環心臟地帶娛樂行地庫開業多年嘅本地時裝品牌EPISODE，因為難捱貴租，做埋下星期一情人節生意就拉閘，被迫搬上22樓做樓上舖只做熟客VIP生意。
EPISODE老闆、批發及零售界立法會議員方剛噚日同八方講，娛樂行間舖係品牌旗艦店，因此去年同業主傾加租時，已主動提出願意顯著加租，多次商討願意由月租130萬元加至180萬元，加幅三成八，可惜誠意不足以打動業主、賭王四太梁安琪。
數口精明嘅四太，最終決定將舖位租予德國著名皮具品牌MCM（Mode Creation Munich），方剛話以佢了解，MCM以每月240萬元租用呢個近萬呎地庫舖位，較現時租金高八成四。自言畀唔起咁貴租嘅方剛稱，面對旺區舖租火速上升只能感到無奈，「人哋出得起咁高租金，我都冇辦法」。
方剛又指呢間旗艦店以前業主係「大劉」劉鑾雄，後來賣畀希慎興業，家陣屬四太所有，佢嘗試喺同區搵地舖，但租金非常「揦脷」；皇后大道中新世界大廈現有渣打銀行地面連地庫舖位，本來月租150萬元，近月亦畀英皇珠寶以300萬元月租租用，租金足足高一倍，面對呢啲名牌名店，一般零售商根本冇可能「搶」到靚舖。

中環將有新景象
非一線品牌撤出，預計中環將有新景象，娛樂行另一面積約1,000平方呎嘅地舖，原由時裝店Laurel以月租100萬元租用，但最近被首飾店Folli Follie以月租165萬元預租，呎租達1,650元，創中環舖位呎租新指標，同呎租逾1,500元嘅銅鑼灣羅素街睇齊。忙於「分燊家」嘅四太噚日出席一個新年酒會時，封口不談家事，只示意新年過得好開心。